北海道/日本自駕心得
心血少啲都唔得？
點樣租？
租邊間？
唔係賣廣告，但我喺日本都係租Toyota Rent-a-car，佢租車還車地方夠多、同城異地還車唔使罰錢、價格相宜、上網就可以預約，所以用開有感情。前幾年個外語版網站唔可以直接租車，日文版先得，宜家好似改進咗，但我慣咗都係用日文版，成日凝住日文版嘅訊息會update啲。
費用由最平嘅Class係P0，然後P1、P2……噉上，如果要喺Class裏面指定型號會再貴啲。時不時會有Discount，例如前兩年做Online Payment九折，啱啱去北海道臨到Counter又發現有折，可以留意網站或舖頭嘅宣傳單張。費用可以網上俾或去到店面先俾 (現金、Visa、Master等)。
有乜手續？
香港人有香港正式駕駛執照只要喺運輸署申請國際駕駛執照(國際牌)就得，到時喺舖頭只要出示護照、國際牌，就可以攞車。(註：P牌唔得)
國際牌可以郵寄申請，亦可到現場去辦事處即時拎(預個幾鐘頭左右排隊同處理)。親自去嘅如果嘅預約咗會更加快，大概三十分鐘。運輸署只係開星期一至五，另外要準備兩張相、身份證同3個月內嘅地址證明。
2024更新：而家只要手機有智方便+（要去郵局做一次帳號綁定），就可以通過App申請國際牌，相可以自拍就得，唔使交實體相，填form俾錢全程喺App做。然後運輸處就會寄俾你，費用一樣。
雖然本簿仔無寫，但有效日期係一年。過咗期要重新申請。
另，Toyota無論幾多個人揸都唔使加錢。
台灣人都應該係差唔多嘅流程，但中國人就唔得，因為規管國際牌嘅日内瓦公約係1949年9月19日簽嘅，嗰時仲未有中國。中國人單憑中國駕駛報照係冇合法手段喺日本揸車，淘寶賣嘅另一個協會所謂嘅「國際牌」又或做証件公証翻譯都係法律上唔承認。
保險
以Toyota為例，即使唔買額外嘅保險都已經全包，最差情況下都只需要墊底(co-pay)15萬JPY (無論撞死幾多人、撞冧幾多物、以及自車全毀)。如果每日俾多千幾円，就連co-pay都cover埋，真係安心過特長夜用，詳情自己睇返。
日本道路規則
同香港最唔同嘅係，車綠燈轉彎時可能行人都係綠燈，車要讓人，同美國、中國嘅規則一樣。
十字路口右轉而非右箭嘴燈要讓對面直行車，細路出大路要讓呢啲就梗㗎啦，用個腦去揸啦。
上面呢個牌嘅形狀雖然好似香港嘅讓牌，但其實係一個Stop Sign，請先停定再開車。
有啲司機好禮讓，如果公路上Cut人哋線，七成都會閃兩下警告燈表示感謝。九成九公路上唔係爬頭嘅車都會靠左，假如限速八十有唔少人會開百二，留意後鏡睇下有幾多架車跟緊，唔好阻住地球轉。至於影快相講真我未見過，公路上總有三成車係超三成速，按限速行真係算慢。
十字路口對頭直行嘅車，有時會閃高燈示意俾你轉右，但唔好開心飇過去撞到過馬路嘅行人。
搵路
以Toyota為例，GPS Navigator跟車一定有，唔使額外付費。部機有日文有英文(甚至普通話)，通常見你係外國人都會offer幫你轉語言，自己都可以撳個Menu掣自己轉。(即係メニュー呀，五十音識㗎啦？)
如果去舖頭或景點，最簡單嘅係用電話號碼去搜尋。但都用個腦睇下合唔合理，上次我搵北海道青池，佢彈個遊客中心俾我。電話搵唔到嘅話，隨非你識啲日文地址點讀就可以by address啦，否則就大概只能比對Google Map位置篤過去。個Touch Screen做drag通常都lag lag吔，最好係篤一下就會re-center過去去，唔使drag。
如果出來條路同Google Map差好遠，我宜家偏向係信架車。有次由湯澤去中禪寺湖，Google Map route出來快成個鐘頭，唔信邪跟Google Map行，但原來要途經嘅金精峠喺冬季封路，Google Map冇更新到，跟架車就冇問題。架車個Navigator其實係有上網，會實時知道塞車路段，所以如果路線唔一樣最好睇真啲。
但亦要小心，我試過喺札幌市內路又密高樓大廈又多嘅地方，個車載Navigator偏咗去隔離街，入Menu做Fine-Tune/Calibration就可以解決。所以真係要帶個腦揸車，唔好盲目睇Navigator之後隊錯入單程路。
日本有好多細路都冇名，但燈位一定有名，Navigator上面都會見到個名，語音有時會提喺邊個路口轉。有美國揸開車嘅唔好誤會佢係cross road名，佢唔係。至於乜嘢「時差式信号機」、「歩車分離式信号機」就唔使理嘅，睇燈做人就得。
ETC
即係收費道路電子收費，同香港唔一樣，佢係一張咭俾你插入車上面嘅ETC機，通訊硬件同計費分開。
以Toyota為例，ETC咭有得租，有一個幾百円固定手續費但行車並冇折嘅，純粹方便少少。但我前排去北海道佢有做Highway Pass公路吃到飽，按日子計價，有嘅話可以計下數睇下抵唔抵。
2024更新：推薦必租ETC，好多時ETC係比現金平。同一路段本身就平啲，而且有啲分段計費優惠（尤其首都高）、備選路線優惠係ETC先至有，現金就會硬食全價或更貴。
雪地行車
轆
以Toyota為例，北海道雪季租車時條軚已經係俾雪天用嘅朱古力軚。至於雪鏈呢啲嘢，一般係唔需要嘅，因為一來唔會去啲咁少車行而積雪厚到要用鐵鏈嘅地方，二來俾得你都未必識得裝。
唔好行去積起厚雪嘅地方 (如鄉郊非路面)，同入咗沙灘一樣分分鐘出唔返來。
清雪
如果泊露天，一起身可能會見到架車舖哂雪。跟車或者有個掃把俾你撥雪，用佢就得㗎喇。其實如果天氣夠凍，啲雪粉一粒粒唔會黐實一掃就清。最怕係天氣唔夠凍而太陽一曬融咗變冰，噉就難搞。同理，千祈唔好用熱水去清，多多熱水都唔夠。(參考Physics嘅Latent Heat特性，你真係有熱水爐咩)
有啲人會隔夜抆起水撥，但咁大雪我又覺得冇乜分別。可能係怕唔夠凍融嗰時黐住？有冇人知可以留一下言。(飛馬電腦Admin補充話係防止大雪壓壞水撥)
煞車
請預留五倍煞車距離，路面一有冰就真係好難先停得到。明明已經慢啲搵路口，只係行緊25kph但都可以要5至10米先停到。
如果平時揸車未試過觸動ABS嘅話，雪地揸就機會來喇飛雲。一踩路去佢會kakakaka好快速噉震(~10Hz?)，ABS幫你喺臨跣軚嘅臨界點鬆一下個Brake，遇上嘅應對方案係繼續踩實個Brake就好，唔使鬆下踩下、唔使Pump佢。鬆下踩下係冇ABS嘅年代先要做，宜家你唔會做得好過部電腦。有必要時可以扭軚避撞 (請時刻睇鏡)，因為理論上ABS係令行車方向仲可以受控。
但記住ABS並唔可以幫你將雪地變成乾地易煞車，只係幫你喺任何地方都以最高效嘅力量—Keep住咬地—去煞車而已。
控車
公路上通常因為車多，唔會點樣積雪 (又或佢都會鏟雪)，但橋或風口位一融一凍就易結冰。公路結冰係幾乎睇唔到，所以要時刻都警覺。
基本上租出來嘅車都有ECS電子穩定控制，踩冰嘅時候佢會幫到你九成控制唔會飄走，剩底一成就睇你有無捉實堂軚。佢一觸動(或即係有需要觸動嘅時候)個軚盤會有外力扯 (如同突如其來嘅橫風一樣)，同埋引擎轉數會有異動，所以捉實軚盤，鬆少少油就可以安全渡過。
停車起步同樣唔好大油，否則跣軚會行唔到。ECS會避免你炒埋一邊，但俾人睇到會樣衰……
落山路嘅話，拖低波總會好啲嘅，起碼踩錯油都唔會飇太快，但對細車來講冇乜技術性因素一定要拖低波，因為brake皮過熱情況極少，又唔會話唔夠風 (重型車用氣壓煞車怕用得多叉唔切風)。但拖波定踩brake同雪地係冇關，都係靠地面摩擦力去制動。但留意返，最好喺直路煞車，過彎時放brake。因為減速需要摩擦力，轉彎亦要摩擦力去提供向心力，又轉彎又踩brake即係會耗用有限嘅摩擦力，一旦超出路面提供到嘅摩擦力就一係brake唔到、一係轉唔到彎，就自求多福啦。(除非你架車有Thrust Reversal…即係冇啦 X
結語
少揸車就真係唔好喺雪地揸喇，保險只係賠錢唔會賠命。行車多睇鏡提高situational awareness，唔好跟車太貼，品字形行車，打燈話人知你想做乜，呢啲幾時都係best practice來㗎啦。
