世界變得快？感覺一百多年前嘅電力發展仲快

我真係一個失格嘅鐵膠，驚覺原來鐵路電氣化進度係咁快

香港東鐵線係喺1983年先至完成全線電氣化，之前係行蒸氣火車頭，而地鐵修正早期系統 (11公里左右長)都只係喺1979年先陸續投入服務，呢兩件事俾我一直嘅錯覺係電力驅動嘅鐵路只係~50年左右嘅事。(雖然我知新幹線其實都好多年，1964年就投入服務)

但原來係50年再加70~80年前就有電氣化鐵路

見有個網友無啦啦提起Schwebebahn — 一個德國自1901年(119年前!)就載客嘅電氣化鋼結構單軌吊掛鐵路系統。佢係一個有13.3公里長，時至今日依然係市內常用嘅交通工具，而唔係上野動物園內嗰啲只有幾百米玩玩下嘅線路 (1957–2019)。(另，湘南單軌電車係1970年投入服務)

2015年新車 & 1898年原型車 (取自官網介紹)

最早電氣化嘅鐵路線應該係1890年英國London Underground其中一條線。London Underground第一條線係1863年投入服務，行蒸氣火車頭。

老母話當年細個坐未電氣化之前嘅火車(九廣鐵路英段aka東鐵線)入隧道要閂窗，否則啲煙就會攻入來，實在好難想像Underground未電氣化之前會焗到乜嘢樣。

差啲唔記得咗香港都有一條歷史悠久嘅電氣化鐵路線 — 香港電車，佢係喺1904年就投入服務。

驚訝嘅地方

1882年 — 全球先至開始有商業運作嘅火力發電站。兩間都係愛迪生有份起嘅，第一間係喺倫敦Holborn Viaduct Power Station商業上唔太成功，到9月喺紐約第二間算商業上成功嘅Pearl Street Station，主要供電係俾電燈用。

1886年 —愛迪生嘅係直流電派，做升壓降壓唔方便損耗高 (近幾十年有嘅電晶體技術先至方便高效地做到)。而1886年先開始有商業營運嘅交流電嘅發電廠/供電網。

如果從1882年計起 —

• 1890年第一條電氣化嘅Underground線係8年後
• 1901年嘅Schwebebahn係19年後