區議會選舉：贏喺個制度…而已
2020年仲要打多次大佬，而且玩法唔一樣
琴晚落去睇自己區票站開票，屈指一算有成接近1%當區選民一齊睇開票，睇來唔只投票率創歷史新高，大概連監點率都係。
Touch wood我個站冇特別異常，多謝票站職員令開箱、疊齊、分類、數票過程都順暢有序。數到我區二號泛民候選人得票有52%左右，未點三號建制都知大局已定，真係十幾張Q票豪埋俾對家都可以贏。現場民眾笑逐顏開，最後喺「五大訴求缺一不可」、「光復香港時代革命」叫聲中開開心心返屋企～
一覺醒來，泛民得票57%，民選議席得87% (註: 部份議席是當然委任)，大埔變埋黃埔，黃大仙黃到發金變金大仙。黃營6月以來五過幾月以來應該都冇咁開心過，同時喺藍營FB Group則見到好多懷疑選舉不公要求重點嘅Post (噉你又唔落票站睇開票？)…哈，小二，來兩客花生！請問香檳賣斷市未、小鳳姐係唔係忙到透唔到氣？
不過呢個結果其實正正反映個制度係有問題…
贏咗都有問題？
唔係要潑大家冷水…
但點解57%票數就可以拎到87%議席？以我嗰區為例，甚至乎係僅僅過半嘅52%就拎到100%議席，一個過半就拎哂，呢個就係小選區單議席單票制嘅特徵。
到出年嘅立法會選舉就唔一樣
立法會嘅選舉機制係大選區比例代表制，得出來票數比例同議席比例會相對接近。
而因為選區之大且涉及多張參選名單，令到策略性配票變得重要，中共嘅選舉機器會有更大發揮空間。
出年9月若然冇Popo幫手助選、港獨之母亦如傳聞所說三月落台嘅話，各路非建制仲能唔能夠We Connect埋一齊？
香港人仲要贏多次！(應該話仲要贏好多次)
請各位2020年9月mark定月曆，唔好去旅行、唔好「返鄉下」。
記住目標唔只係關鍵一席、亦唔係泛民贏……而係要建制輸！
係，我知1997以來泛民曾經都擁有過地區直選議席但乜都做唔到…
係，我知呢個制度仲有功能議席、比例代表制仲有含淚投票問題。
但曾經唔work嘅嘢，就代表要舉手投降拱手相讓？我相信今日香港人已經唔一樣，正所謂兄弟爬山各自努力，唔應該放棄任何一條戰線。
區選報捷，開心還開心，唔好忘記五大訴求只係滿足咗一項，而且Poly手足仲未脫險。
贏咗？錯哂……其實啱啱先開始。
