香港人喺機場出境過e道嘅三種方法
喺機場出境最少有三種自助過關方法，但現場指示又唔係好清晰。不過諗深一層，的確太多資訊同選擇係會令到部分人hang機，尤其喺出境過關已經忙到甩轆嘅環境…
自助出境方法
人面識別零接觸嘅登機易Flight Token
若喺入禁區前/保安檢查前嘅閘口，用香港特區護照或回鄉証（港澳居民來往內地通行証）通過自動閘機，之後嘅出境關卡就可以用登機易。
喺出境嗰時，搵返有登機易Flight Token嘅閘口（具體來講即係安裝咗鏡頭嘅閘口），行埋去然後靠人面識別就過到關。
最方便之處就係過X光/金屬探察器之前就可以收好証件、登機証等等，直到上飛機都唔使再拎出來。
重點1：香港人用外國護照就唔得，但若拎外國護照入境嘅旅客可以行離境易閘口。即香港人若然返香港係用香港身份証入境，但因為雙重國籍所以有外國護照，如果禁區前係掃瞄外國護照通過嘅話，噉就唔可以用Flight Token出境，只能拎返身份證出來用以下另外兩種方法。
重點2：買機票時或打算入境用嘅証件，同Flight Token係無關係。如去日本程機票係登記咗用BN(O)護照，依然可以拎香港護照做Flight Token。
重點3：大部分航班都唔會再喺登機閘口前再check ID，但有一啲常見例外 — 如果飛中國大陸但冇show過回鄉証俾真人crew睇過（如冇寄艙行李），喺閘口要行埋去counter登記返。
身份證 — RFID/NFC式
如果任何原因冇用到Flight Token，例如上面講嘅証件問題又或揀入手通常故意唔用Flight Token，噉出境過e道就要用返身份證。
而家新一代嘅身份證可以唔使插咭嘅。去到出境閘口時，只要將正面（有相嗰面）朝下放喺掃瞄器上面，部機就可以經NFC解讀到咭入面嘅資料。
第一度閘開咗之後，大部份新機都有人面識別唔使再打手指模。企喺個腳印仔上面，望鏡頭等佢認一認樣就可以過。
身份證 — 智能咭式
即係最傳統行e道嘅方法，插咭。留意返新身份證嗰粒晶片去咗背面，所以要背面朝上嘅方式插入去。
生物特徵護照和其他國家嘅應用情況
生物特徵護照技術係由ICAO（國際民航組織）所製定嘅技術標準，其中主要係生物特徵可以用RFID/NFC方式讀取（配以MRZ嘅資料解鎖，所以先要至要掃瞄照片頁而唔可以直接冚埋本嘢當八達通噉嗶）。第一本兼容呢個技術嘅護照係1998年由馬來西牙發出，仲早過USB 2.0出世。支援呢個標準嘅証件會有以下呢個logo，喺香港特區護照以至回鄉卡都有。（身份證冇，但NFC解讀資料嗰part嘅技術以我所知係一樣，可能因為冇MRZ所以唔係100%符合）
而越來越多出入境管制站都有自動通關化機器俾外國人用，如上面提到機場禁區前嗰一度閘，又或日本機場出境、新加坡入境、甚至孟加拉首都達卡機場入場，都有呢啲自助機。佢哋都可以處理大部分嘅旅客護照，一大因素就係因為有ICAO呢一個標準。
不過入境改用自動閘機有個問題係，佢唔識吸印仔或貼貼紙。
日本immigration其中一個細微但好重要嘅工作就係貼一張有標明入境日期嘅貼紙，遊客購物免稅同租車都靠佢😂。按新加坡、孟加拉嘅網站介紹，如果用自動機嘅話就唔會有印仔。
如果冇咗貼紙，商舖又點知客人係用咩身份入境可唔可以有免稅呢、交通警察又點知你係旅客而可唔可以用國際牌呢？Visit Japan Web都用咗成一年半載先由入境/海關兩個QR Code合二為一變成一個，日本入境要搣甩張貼紙然後推廣自助機，涉及公、私多個範籌同流程，睇怕都要一段時間。
