Elon Musk有份搞嘅腦機介面(BMI)— Neuralink — 可以做到乜

攻殼機動隊的時代要來臨了嗎？(簡單講: 25年後有可能)

人機介面、腦機介面

我哋平時用電腦、同電腦互動，都需要通過「介面」去做，最常見嘅電腦輸入介面有輕觸式螢幕、鍵盤、滑鼠、甚至乎Toycon、Joystick、Kinect+Computer Vision等，而電腦輸出介面有螢幕、喇叭、震動、甚至凸字機等等。

通過呢啲人機介面，人腦同電腦先至可以互動，可以將指令傳俾電腦，而電腦可以將結果回傳俾人腦。而人機介面嘅聖杯形態(Holy Grail)，就係腦機介面 (Brain Machine Interface)，其終極形態係可以賦與人類如同心靈感應嘅超能力、又或真•虛擬實景。呢樣技術亦都係好多科幻電影中出現過。

《Matrix》通過Headjack讓人進入(存活於?)虛擬世界

《攻殼機動隊》中絕大部份人都有做過電子腦植入而提升生活質素。主角草薙素子自幼因喪失肉體、腦部以外全身機械電子化。作為網絡特務嘅佢，通過神經電子連接就可以crack入其他電腦甚至其他人嘅電子腦、存取其他人嘅思想。

前兩日 (2019–07–17)，Elon Musk有份投資嘅Neuralink發表咗第一版腦機界科研成果，目標係喺2020年進行人體實驗。

噉係唔係即係一年後就有《機殼攻動隊》嘅情節上演？我諗應該係早咗10至25年啦。

xkcd 678: Researcher Translation

Neuralink v1

發報會: https://www.youtube.com/watch?v=lA77zsJ31nA

(以下部份內容來上述影片，剩低嘅部份係我加鹽加醋嘅9up)

大腦係由一千億個神經元所組成，每粒神經元可以有成數千觸突，以化學反應產生電流去激發另一粒神經元，個別神經元根據唔同嘅激發情況，會再而決定要唔要、或幾時再傳導、激發某一個觸突。就係呢抽嘢令大腦可以感知、學習、思考、控制等等。

而因為係以電流傳導，所以係可以喺神經元附近插一啲探針，去讀取傳導嘅訊號，甚至從外面喺腦部產生神經訊號。

而Neuralink v1係由幾樣嘢構成 — 超微型探針陣+微創手術+訊號放大器+解讀程式。