霍金有反對「天眼」探索外星人咩？蘋果嗡乜9…

科學家都用射電望遠鏡搵外星人搵咗幾十年啦

北京師範大學張同杰教授指，全球目前最大嘅單一口徑最大的電波望遠鏡 — Five-hundred-meter Aperture Spherical radio Telescope、aka FAST、aka 「中國天眼」，正在做系統升級，將會喺2020年9月「投入新觀測」，對探索外星人作出貢獻。

喺貴州嘅天眼/FAST。接收器係吊喺六枝塔係組成嘅威也陣之中，通過控制威也而控制接收角度。

然後呢幾日就有以下嘅新聞報導。

【探索地外文明】唔聽霍金生前警告 「中國天眼」9月尋找外星人

報導嘅問題係？

其中蘋果今次唔只係標題黨，仲要係內容黨…當中我注意嘅幾個點係：

1. 暗示「天眼」、或中國、或人類將會、或最近先至用電波望遠鏡探索外星人存在
2. 暗示天眼有可能會發射訊號去聯系外星人
3. 暗示霍金生前反對建造「天眼」、或反對利用「天眼」乃至任何方法去探索外星人

而呢幾點都係錯到離哂大譜，錯到霍金都要彈起身嗰隻！（唔該墳總可唔可以訪問一下佢？）

我哋點用電波望遠鏡去探索外星人？

天文學101

射電(望遠鏡)、(無線)電波(望遠鏡)其實係同一樣嘢，即係Radio (Telescope)，而可見光、AM、FM、Wifi、4G、5G、微波爐嘅微波、紅外線、紫外線、X光、伽瑪射線統統都係電磁波嘅一種，只係頻率/波長唔同(頻率同波長其實講緊同一個物理特性)。Radio/射電/無線電/無線電波/電波係泛指波長0.1mm以下嘅電磁波，即唔包紅外線、可見光、紫外線、X光、伽瑪射線，但包括5G等流動通訊、Wifi、微波、數碼電視廣播、GPS、收音機、衛星通訊等等嘅波段。

喺太空嘅天體本身係會發出各種嘅電磁波訊號，例如大家都知太陽會發光(可見光)、發熱(紅外線)、有紫外線會致癌等等，其他恆星一樣都會。其他天體如黑洞蒸發出來嘅能量就以電磁波幅射揮發走，脈衝星因為高質量嘅恆星旋轉而會好似燈塔噉旋轉射出一啲電磁波，乃至每種化學物質都有特定嘅電波光譜(如同指紋一樣可以辨認係乜嘢物質)，所以天文學做觀察並唔只係靠可見光望遠鏡，而係有用可以接收各種電磁波波長/頻率嘅望遠鏡。