成日返鄉下梗係整返張回鄉咭
日本TTP (Trusted Traveller Program/特定登録者カード)心得
新正頭，整返張日本「回鄉咭」 aka Trusted Traveller Program嘅「特定登録者咭/Registered User Card for Automated Gates」應下節。
成為TTP嘅好處
入境、出境可以過自動閘機（自動化ゲート、即如同香港的e道）
因為連日本人都唔係by default可以用自動閘機而係要另外登記，所以自動閘機通常人比較少。
但設有自動閘機只有成田(NRT)、羽田(HND)、中部(NGO、即名古屋)、關西(KIX、即大阪)呢四個大機場。[來源]
萬一自動閘機壞咗，據說會被指示去排日本人條隊入境。
多張咭留念
即係其實就冇其他用途😂可以話同神社朱印、集郵一樣。
呢張咭並唔係綠咭、並唔係在留卡、純粹只係指紋登記過閘機，旅行依然要有有效嘅passport。
咭本身有效期係3年，會同passport number綁定，由於換passport會換number，所以任何一樣過期先就會過期。出、入境時依然要用passport。
可能嘅壞處
我仲未用過佢入境所以只係網上睇到…雖然入境時咭背係會打印入境地同埋日期，但免稅店或租車公司可能未係好熟呢張嘢而會節外生枝，畢竟少人用…Your milage may vary。但網上亦有見到成功案例。
TTP申請辦法
正式嘅就睇返官法說明：https://www.moj.go.jp/isa/publications/materials/ttp2_index.html
簡單而言…
要求
- 所持相關護照入境日本要係有免簽証待遇。即係揸港、澳、台、BN(O)護照都得，中華人民共和國嘅就唔得。
- 有Platinum等級以上嘅信用咭（包括AE對應級別、銀聯對應級別、比白金更勁嘅MasterCard World/World Elite、Visa Signature/Infinite等），即可符合「D類人士：有一定財力」嘅申請條件。白金卡香港真係通街都係，連AEON張Wakuwaku都…
另註：A類為美國人有Global Entry者、B/C類為商業相關 — 基本上夠拎APEC咭囉、E類係俾A/C類拎咗卡嘅人嘅親屬。 - 費用2200円
- 拎咭之日（即第二次審查）喺1年之內要入過兩次日本境，包括拎咭嗰一程。
- 冇語言要求、冇學歷要求、唔使面試。喺香港乜咭都係白金級起跳嘅情況，真係師奶有張信用咭都合格。
申請方法同流程
- 上TTP網站online填form登記，呢一步唔使錢：https://www.ttp.moj.go.jp/TTP/xhtml/apply/top.xhtml
- 填form要upload相，亦會係最終用喺卡上面嘅相。用手機自拍影就得再crop下就得（當然要熄美顏…），唔使實體曬相、唔使特登去影「証件相」。
- Submit之後等第一次審查(preliminary inspection)，我係2023/11/24申請等到2023/12/18通過，即係用咗24日。
- Submit後和第一次審查通過皆會有email通知。
- 第一次審查通過後開心去日本，期間預留時間拎卡做第二次審查。（未過都可以入境後等嘅，無話要過咗先入得境）
- 第二次審查必須喺第一次審查通過後6個月內做。另，第二次審查之時要1年內入過兩次日本境。
- 第二次審查可以入境之後做，亦可以出境時做。若一切順利唔使排隊嘅話，需時若15分鐘。
- 第二次審查嘅地方係叫「指定登録場所」：https://www.moj.go.jp/isa/publications/materials/ttp2_pre-check_pre-check_document07.html。設置喺嗰幾個四大機場。非禁區(landside)同禁區(airside)都有。
喺非禁區(landside)內嘅通常係喺check-in counter附近，具體地點同開放時間睇返上面網站，房間外有「自動化ゲート登録」嘅標識，駐有immigration人員。呢個房亦係日本人登記要用自助閘機嘅同一個地方。
如果出境時做，就喺過咗安檢security checkpoint之後，但過immigration之前，搵immigration嘅人做。 - 第二次審查就要俾錢，但唔收現金、唔係碌咭、亦唔係網上俾，而佢只係收「收入印紙」（即係如同郵票嘅實體印花、下圖）。收入印紙可以喺任意便利店買（Lawson、7–11、Family Mart）或任意郵局買，最方便咪機場嘅便利店，直接向收銀職員問就得。如果airside做記得要買咗收入印紙先。
- 除咗passport、白金信用咭、收入印紙以外，唔使帶任何其他嘢。Email唔使print、相唔使print、信唔使print。不過要準備個application number（或成封email手機show出來）俾職員核對。
- 第二次審查時職員會填form、打指模、再影一次相、收錢、影印passport同埋credit card（會遮number）。所謂審查其實冇乜嘢審，只係見下你真人同張信用咭。
- 一切手續完成後，會喺passport最後一頁吸個印「日本国自動化ゲート利用希望者登録済」同埋吸個到期日，表示你係登記咗可以用自助閘機。然後會即場製卡，張咭幾十秒就印好。大功告成。
過關使用方法
「回鄉咭」在手之後，之後離開日本出境就可以即刻用。
與其話「可以」，我體驗係應該請即刻用自助閘機而唔好再行人手通道…（下面詳細）
自助閘機設置喺日本人通道旁，但唔係部部機都可以用TTP。例如成田T1出境4部只有1部係support埋TTP，其餘都只係俾揸日本passport嘅人用。
而用TTP出入境依然係需要passport，而且仲要用登記嘅嗰一本passport。
- 出境：先掃描Passport MRZ，然後拍TTP咭(NFC)，然後打指摸，出境。
- 入境：我仲未試過TTP入境。試完之後再補 XD。估計流程差唔多，同埋應該要插將TTP咭入某處，因為要喺咭背打印入境日期訊息。
我嘅故事
指紋唔見咗！？
日本有個問題係冬天勁乾，喺日本一日就連電話都unlock唔到，難怪TTP登記時指紋變到capture唔到。職員話入境時打指模個清晰度要求係唔一樣，TTP登記嗰個要求係會高啲噉話。
我第一次係去關西KIX T2 landside做。打指摸標準流程係用食指，唔得就試中指、次選係無名指、然後尾指、最後姆指。問題係我十隻手指試過哂，只係左手嘅無名指可以時得時唔得。現場有提供酒精洗手液、佢有俾點鈔蠟我試（數銀紙用嘅一塊粉紅色餅…）、試過洗手、紅白機插卡帶式呵氣、用膠紙黐走手上污染物……真係諗得到嘅方法都試齊，統統冇用。喺打指摸呢關打咗半個鐘都搞唔掂，放棄。
之後新正頭1月1日有時間，就再過去羽田HND T3 landside做。有之前嘅失敗教訓，今次前一晚就喺酒店開行加濕機、搽埋啲潤手嘢、出門口時仲戴埋滑雪手套保暖保濕，BUT…BUT依然係kick住喺打指摸呢關😂
但今次似乎職員有經驗啲。我KIX嗰次有偷睇到佢個登記程式係似~2000年代嘅setup wizard UI，手指印上去得就可以next、唔得就retry，有如香港e道打指摸個UI一樣只係話你知得定要重試。而HND今次職員識得打開指紋採集嘅advanced mode UI（而且見佢要拎一個dummy passport photo page/MRZ去開），UI喺印完隻手之後可以見到採集到嘅圖像，如同過中國關嘅e道會有image feedback（不過TTP嗰個唔係real-time），職員好有心拎起部laptop俾我睇個結果係印成乜嘢樣，令我知道點印會好啲點印會差啲。
總結打指摸心得如下：
- 唔可以太大力，唔好死力撳落去，否則坑紋會壓偏哂，毫無contrast得1分。（系統對清晰度會打分，1係最低，50先至合格）
- 唔可以太細力，要喺唔壓偏嘅情況下確保接觸面足夠大。當然唔好只係壓指尖而係整個手指肚都有接觸。
- 壓落去之後，每次retry之間就唔好鬆開或移位，假以時間隨住手指上嘅分泌，採樣結果會越來越高分。但若然搞唔掂就酒精擦乾淨部機同手指再來過。
- 其中一隻手合格之後就會keep住最高分嘅圖像記錄，唔使再擔心佢而可以focus喺另一隻手。但retry時依然要放兩隻手擺上去。
我最終係雙手都係用無名指去過關。我唔知點解其他手指都係1分，係無名指有啲氣息，睇住個分由1、8、10、十幾、廿幾、30、31、38…又跌返、上上落落、其中一隻得咗先、然後另一隻終於過40…等等等，職員同我一樣咁緊張。
最終搞掂大家都鬆一口氣，好彩冇其他客冇阻住人🙈（HND T3當時有3位職員當值、雖然得我1個客；KIX T2就只有1位）。指紋過咗之後就好快，印相、印影、製卡，幾分鐘就搞掂。
然後…某日之後出境
出境我係喺成田NRT T1。理論上張卡就係可以即刻用，隊passport入去、拍卡、打指模。BUT — 人生就係呢個BUT，又係指摸又過唔到關啦😂
試咗四次之後放棄，排返傳統通道。
但埋到去個職員就hang咗機。somehow佢掃描完我本passport之後露出一副難為嘅面孔。佢掀下本passport見到我有登記自助閘機蓋印，我show張TTP咭佢睇，但同佢講我指摸過唔到我都冇計🤷…然後佢就escalate咗我埋去crew lane嗰邊處理。
不過佢哋好快就了解到情況，最終都係喺我passport上吸個出境印然後如常出境。
唔知下次入境如果張卡唔得行人手會唔會有咩麻煩，又或者如果卡入但卡出唔到會點，到時再update😂
