記日本回鄉咭入境使用
日本TTP (Trusted Traveller Program/特定登録者カード)入境心得
前傳
入境
今次經成田T2入境，即使其實我係差唔多第一個人衝落機，亦可能係係red-eye機所以時間尚早冇其他機，外國人入境嗰邊冇人排隊，但有張咭冇理由唔體驗下嘅？
殺去日本人嗰邊嘅入境counters，最右面會見到四部古佬嘅「e道」自動閘機通道，每條通道頭頂都有個mon顯示係for日本人、定係for日本人+TTP。我當時得一條lane係可以行TTP。
操作程序係：先掃瞄Passport，然後插咭入部printer/card reader複合機，之後要輸入入境後居住地址同埋逗留時長，印指紋，影相/人臉辨識，打印紀錄，拎返張咭，完成。
住址同逗留時長可以喺返TTP網站預填，但佢同VJW無關連，亦唔可以用VJW個QR Code。無預填嘅話就用touch screen篤。
我嘅失敗初體驗
唔知係咪我張咭第一次用以及冇喺過TTP預填，佢load住址嗰頁load咗30秒到1分鐘左右，不過又俾佢load到我上一次入境嘅居住地址預填咗（上次係VJW行訪客傳統人手通道）。但點都好都係要改過，因為上次係去大阪今次係東京。
然後好興幸指紋1 take過。喺UI係會提示返係用邊隻手指打，唔怕會記錯。因為上集講到我隻手乾採集指紋試咗無限次先得，最終係印咗無名指（正常係食指）。撳隻手指只係幾秒鐘就聽到叮噹嘅聲音，而唔係等到timeout，當堂個心安樂哂，可能係啱啱落機隻手仲未乾到裂啦。
之後就影相，睇落都好正常。
但之後就…顯示Error，彈返張卡俾我。
我同counter後面坐檯嘅入境處職員你眼望我眼，然後佢call馬叫另一位來商量點搞。決定轉用另一條lane再試多次。
轉lane佢要reconfigure啲嘢，部電腦唔知run乜好鬼慢，大概用咗1分鐘左右，先至見到上面個LCD換咗，然後可以再入去。
再試，過程都好順利。今次load住址就好快，不過又要人手再篤一次。然後指紋OK、影相OK，之後UI提示會印資料，我聽到部printer有動作。
再過幾秒，又Error！Printer上面都有error燈，佢食咗我張咭！
嗰位職員都O咗嘴，跑返去房擸條printer鎖匙，跑返來打開佢拎返張卡。但至於係乜事就佢都唔知（或者唔講得、或者溝通唔到俾我知），我眼見就唔似係色帶用完…
Anyway，我話不如行返人手啦唔使苦惱點解喇，我開個VJW QR Code出來話佢知我都填好㗎喇。日本人條隊都開始多人，但佢就帶我去插隊，跟住好快就搞掂。
我嘅成功初體驗
較早前去關西機場，一去到過關位真係嚇死我。一出體溫檢測就係過關嘅人龍龍尾。目測分分鐘有成400人，所有櫃位全開，剩底一條係日本人/特別通道。大概由於有新式自動閘口，日本人一般唔使行傳統櫃位。
而TTP呢個時候就大派用場，TTP嘅舊式自動閘口一個人都無。
第一次試，依舊同上次一樣噉Fail。但第二次終於成功。我諗我知道問題喺邊。
佢臨印咭前最尾個一步係影相，首先會彈一個camera feed preview，會叫你企好等條紅色邊轉做綠色邊，然後UI提示「The photo has been taken. Please look at (4)」。我之前可能都誤會咗係影咗相而望開咗，但似乎係佢呢個狀態再過多五秒先會影相，然後應該係用來做人面辨識。總之就係俾個UI陰咗。
頓時覺得呢2200円真係抵到爛，抵過啲NEX特急券之類。過完關我件行李都出來，效率真高。開開心心順順利利搭車去。
結論
張咭嘅好處係可以行日本人嗰邊，當喺繁忙時間外國人嗰邊多人就好好用。
但部機本身就慢到爆炸，UX基本上係Windows 7之前嘅產物（感覺部機都應該係行緊Ｗindows 7），連load下個step都覺得慢，絕對唔係而家啲Face Express出境機又或VJW嗰皮。
就過關過程本身而言，行人手通道加VJW一定快過TTP，唯一決定因素就係排隊嘅時間。正如我成功嗰次，我諗傳統櫃位至少排一個鐘。
又或者，2200円當買張紀念品都值㗎😂。
另，同場加映落機18分鐘衝上車
事源係落NRT然後要趕去HND轉內陸機，但去程出發delay，不得不趕頭趕命9衝。落機係18:23，內部機喺HND出發時間係21:00，但我一大個行李喼一定要寄艙，心諗搭的士喺繁忙時間都未必搞得掂，搭鐵路應該係唯一最快方法。
因為出發已delay，喺機上已經同空姐講我有轉機行程，睇佢哋有咩辦法，佢哋用message問返公司可以點安排。
我坐嗰架係ANA，機上有免費Wifi可以用，朋友幫我check到其實NRT晚上有Peach（ANA嘅廉航）去同一個地方，我問埋可唔可以幫我改得到，講到尾係你delay嘛唔係我嘅錯嘛。
Crew喺機上就覆返我，Peach就轉唔得㗎喇；若我自己買Peach飛走咗而no show 2nd leg嘅話張Itinerary回程都會有問題；佢哋嘅offer係提供一晚酒店，同埋免費改第二朝嘅機票。我話我真係好想趕過去試下，有其他行程定咗，所以喺機上用餐結束之後安排我轉上去Business Class坐，等我可以衝落機。同時亦安排咗有人落機後喺地面接應。
18:22 — NRT T1踏出飛機。喺bridge口接應我嘅地勤剛好係識講普通話/國語嘅，所以溝通暢順。但嗲咗兩句之後，佢都係confirm我係無辦法轉到去嗰班Peach。我話噉算喇我先自己衝。佢仲有啲任務在身，話之後喺baggage claim搵我。
18:23 — 放棄地勤，跑過所有頭先喺前面嘅business class嘅人。外國人入境櫃檯好好彩冇人排，直接有人serve，光速完成入境手續。
落到baggage claim area，見行李未出，先走去海關部VJW機搞咗手續先。啲staff好奇怪見我點解搞完手續又走返去行李帶，同我講出口喺嗰邊喎，我都懶得講。
18:33 — 執到個喼。係因為ANA？係因為NRT T1？定我出發checkin算遲？我冇membership status但都出得咁快。
然後衝落出去海關，頭先嘅staff認得我做過部機直接指我去出口。衝落樓去京成電鐵，打算坐18:44開嘅京成Access。
18:37 — 喺落緊5號月台之時，check手機見到朋友message話18:40有Skyliner。就仆返上去大堂層，想搵Skyliner售票機但環顧四周只有一部精算機，即刻問staff佢話月台就有，仆返落去1號月台
18:40-ɛ—一落扶手電梯就係Skyliner售票機，嗶Suica但唔夠錢要補，好彩手上有現金隊10000円落去，部機都好快唔係TTP嗰個級數。拎到飛之後仆上車。10秒之後，車門關閉開車。
由於趕到Skyliner，就放心哂。之後西日墓里轉山手線、濱松町轉Monorail順利，20:00到達HND T1去checkin。
即使唔用TTP，都可以好快🤪
