福島深度遊: 我同ALPS處理水最近嘅距離

其實有民間團體辦福島深度遊 (Reak Fukushima)，目的係俾外國人了解而家福島嘅情況。

我喺上年2022年12月即係COVID開返後冇耐返鄉下，其中一個行程就係join呢個tour。咁啱上星期四（8月24日）福島第一終於要放水，趁熱鬧補返篇遊記，後面再補充我對排水嘅見解。

Real Fukushima

前一晚先喺小高駅對面嘅双葉屋旅館待機，因為第二天嘅行程一早就出發。

嗰度離福島第一發電廠直線有15公里遠，福島第一機電廠核災後係屬疏散區域，但大概係喺2015~16年左右解封。

嗰排就快聖誕節所以有啲裝飾，但附近真係人

四周圍勁少人，我諗本來鄉下地方就係噉，唔係好關核災事。

行程五之一: 上Lecture

第二日一早先由Real Fukushima嘅導賞員車開車接我哋同埋其他團友去東京電力廢煆爐資料館，去聽東京電力安排嘅lecture。

Tour一個月搞一次。當日共有6個人參加。我同friends 4個，另外兩個來自歐美地區嘅人士。而導賞員充當日英翻譯員。佢話係福島本地人但喺外國生活咗一段時間，幫手搞呢個tour係想為福島做返啲嘢。

左: 導賞員、右: 東電職員，喺間班房/會議室排排坐。圖為1–4號機現況講解

Lecture主要cover返點當日發生乜事同講解幾個受災嘅爐 — 即1–4號機 — 嘅現況，亦係為咗跟住落來去現場視察先prep下會見到乜同係乜嘢building。但更主要嘅篇幅係講污水係點樣處理，Tritium (氚)同重水係乜嘢，做咗乜過濾，同埋個排放計劃。我同friend子話呢個係東電大外宣😂

而佢哋嗰排主要忙緊嘅係清空已用燃料棒水池 (Spent Fuel Pool)， 因為海嘯/氫爆對建築物造成破壞，要用唔同嘅方法吊走燃料棒。第二係阻止更多污水產生，同埋處理污水。另外研發探測已熔毀堆芯嘅機械人，尤其爛咗嘅三個爐嘅爛法同情況都唔一樣、廠房受損程度亦唔同、因應不同內部情況要探測嘅目的亦唔一樣，所以各廠房需要截然不同嘅機械人設計。

污水最大嘅來源係源源不絕流入嘅地下水，咁多年來整咗啲凍土牆同埋抽水井，係減少咗好多但依然每日都有新水流入受損嘅廠房然後就變成污染水。詳細做咗啲乜東電Website都有講。