深圳歡樂谷雪域雄鷹炒車
雪域雄鷹(Bullet Coaster)係一組由美國S&S建造嘅彈射式過山車(Launched Roller Coaster)。如同日本富士急遊樂園嘅ド･ドドンパ(Do-Dodonpa)，都係同一間公司生產嘅同型號過山車。
呢隻彈射式過山車係用壓縮空氣推動，幾秒之內就可以加速到時速百公里以上。喺路線設計方面，彈射之後第一段軌道就係上升到最高點越過一個「山峰」。
2023年10月27日，深圳歡樂谷雪域雄鷹發生列車相撞事故。據新聞引述現場消息，係因為前車車速不足，翻越唔過最高點，列車從接近高處溜後，然後撞上停喺月台上另一列列車。事故引起8人傷、4人入ICU。
雪域雄鷹係有兩列列車運行。據了解，發車順序如下：
- 前車駛離月台，進入彈射段
- 後車由月台前的brake run（剎車段）離開，進入月台埋站上下客
- 當確保後車清空brake run後，彈性機制才會開始運作
所以推斷溜空發生碰撞時，第二列列車會喺月台，而唔係更後的brake run段。
防溜後裝置？
顯然列車越唔過最高點係一個可以預見嘅風險，有幾萬個原因彈唔過去而向後溜，所以設計上必然係有溜後時會剎停列車嘅保險裝置。
一般鐵鏈拉動嘅防溜後裝置並唔適合用喺彈射過山車…
所以彈射型呢一隻係用渦電流式剎車(Eddy Current Brake)作為防溜後嘅保險裝置。當列車上嘅永久磁鐵喺金屬鰭片旁高速通過，就會產生渦電流，動能轉變成電能再變成熱能消耗掉。（臨埋站嘅剎車段亦見有同樣設計，詳細睇片）
好處係剎車力度係同速度成正比，車越快、剎得越勁。另外剎車過程係無接觸、零損耗。最正嘅係佢完全唔使用電，完全係被動生效，只要鰭片在、永磁在、就一定有效果。
但有個問題，如果有剎車系統喺度又點彈射呢？所以喺彈射出去之前一刻，剎車鰭係會向下䧏，等列車通過之後就會回恢到預位(Armed)位置。據講，啲鰭嘅default就係喺armed position，而令佢下降係用氣壓達成。萬一氣壓消失，例如喉管突然破損，鰭片亦會彈返起身，即係係一個遵從fail safe嘅設計。
成個設計上睇落係幾周全，噉點解會仲可以撞得到呢？呢層可能係機電問題、可能係保養相關嘅人為問題、再陰謀論啲講可以係園方見到壞咗而採取唔合法嘅手段override强行營運……實情係點嘛，唔知會唔會俾大家見到呢？
註：ド･ドドンパ因為其他原因 — 懷疑係改版後速度太快太劇烈而造成多宗受傷骨折事故 — 已喺2021年停運。
2024–01–10更新：報告出咗，詳見另文
