深圳歡樂谷雪域雄鷹炒車：出咗報告

有生之年見到份報告有少少意外

2023年10月27日，深圳歡樂谷雪域雄鷹發生列車相撞事故，然後喺2024年1月8日深圳市出咗報告。

上一次講到…

深圳歡樂谷雪域雄鷹炒車

上次話嘅陰謀論就冇嘅，原設計亦都好周全，就係人為保養馬虎了事最終炒車出事。

首先更正返受傷人數，第一次通報係有誤。據報告，設備上乘客共31人，3人冇接受醫療自行離開。其餘28人當中，「重傷3人、輕傷7人、輕微傷11人、未達輕微傷7人。」其中17人第二天依然留醫，到12月27日都仲有3人留緊醫。

註：按中國傷損鑑定標準制度，重傷是死之前最嚴重嘅級別，包括如植物人狀態、阿Mo般四肢癱瘓或雙盲等。輕傷包括如單盲、四肢中有長骨骨折或Eason般爆單丸等。輕微傷包括普通細骨骨折或要縫針嘅大傷口等。普通擦傷撞瘀扭親下就歸未達輕微傷。

報告Link

報告PDF: https://amr.sz.gov.cn/xxgk/qt/tzgg/content/post_11089930.html
PDF備份: https://docs.it9.gl/backup/20240108_happyvalley_shenzhen_bullet_coaster_accident_report.pdf

新聞稿: https://amr.sz.gov.cn/xxgk/xwzx/mtbd/content/post_11089993.html

事故原因TL;DR

渦流制動係靠列車上嘅永久磁鐵，當喺金屬制嘅制動板上面隔空滑過，就會因為eddy current effect (渦電流效應)，而產生制動效果。全程無接觸無損耗、唔使用氣動或電動去夾實，而且速度越快剎車力越高，原理本身如同萬有引力一樣永不失效。

渦流制動器示意圖 (上次我叫佢渦電流剎車鰭片) (圖源: 報告)

設備嘅彈射段有27塊制動板，當準備好彈射時就會以氣壓拉動唧筒以連杆機構拉低制動板，然後列車就彈射出發。

制動板在待命位置和如何落下的示意圖。橙色估計是限位和位置感應器。(圖源: 報告)

而當任何時候出現唔安全嘅情況，系統就會將所有制動板重新抬升至待命位置，目的在於剎停運行中嘅列車。

喺當刻事發前彈射時，某制動板有感應器因振動而未有確切感應到制動板完全落下，所以將系統工作模式跌落到上述嘅安全模式。但列車因為已經有一定嘅速度，所以未能喺加速段完全剎停，但剩餘嘅速度亦唔夠爬過個坡。

制動板共有27塊，1號係最後一塊 (圖源: Youtube截圖和報告)

但因為1號制動板嘅連接螺栓斷裂，喺進入安全模式重新抬升時左右出現左右偏移…

一號制動板螺栓斷裂 (圖源: 報告)

然後列車爬唔過坡倒溜嘅時候，車上嘅永磁就同偏移咗嘅1號制動板發生撞擊，掃冧哂所有永磁/制動板，導致渦流制動失效，列車剎唔停。

損毀情況 (圖源: 報告)

至於點解螺栓會斷咗，簡單來講就係定期維護做得唔好，上次2023年中大修見到都冇處理，詳細就睇PDF啦。（設備喺2011年落成，大概10年就要大修）

而呢啲固定制動板嘅螺栓喺2019年第一次斷，直到2022年底期間共計斷過9次（按：我諗係指27塊板都有發生過，未必係全部集中喺1號板），每次都係換咗就算，冇進一步調查。大修負責嘅潤昌公司時即使見到地面有斷咗嘅螺栓殘骸亦冇深入去了解搵根本原因。

好笑位：CYA

眾所周知，如上次講，雪域雄鷹原廠設計係外國勢力美帝…咳…世界知名嘅機動遊戲製造商美國S&S Worldwide出品，同型號過山車亦喺日本富士急遊樂園有安裝過（ド･ドドンパ）。負責施工同大修嘅就係中國嘅潤昌公司（深圳市润昌游乐文化集团有限公司）。

其實2023年中大修之後，S&S有受潤昌所託做安全可靠性評估……

其中《检验报告》提示了事故设备存在“涡流制动板未卡入导向槽，当车辆弹射失败会导致涡流制动板刮伤车辆永磁体”的风险。6 月14 日，S&S公司将上述报告以邮件形式主送润昌公司，抄送深圳欢乐谷和中国特检院。

— 《广东省深圳市“10·27”一般大型游乐设施碰撞事故调查报告》

報告有嚴詞批評潤昌、中國特檢院（中国特种设备检测研究院），以及同大修無關但喺2023年4月被深圳市委託做過全市機動遊戲檢查嘅大連鍋檢院（大连锅炉压力容器检验检测研究院有限公司），佢哋有做假、檢測同維護都走過場、唔跟Manual做嘢、收到S&S嘅email之後都唔理，而報告就冇提到S&S有任何責任。

呢下Cover Your Ass真係專業大公司嘅工作精髓之一，試諗下如果少咗呢封email，即使唔被國家機器卸膊指罵，最少都會一齊連坐。我可以想像到S&S當時見到件設備噉嘅狀況，對住班人勸又唔聽又唔去整嘅時嗰嘅無耐樣，無計可施之下唯有白紙黑字寫清寫楚。而家真係出事，大概就因為噉先至可以割席割得乾手淨腳。