Tesla嘅Autopilot和未來嘅Self-Driving

autopilot唔係self-driving呀

飛機用Autopilot嘅時候，機師都要𥄫(gup)住個飛行電腦有冇做錯，留意周圍嘅環境。Tesla嗰個autopilot，其實都係一樣。

完 (好似已經講哂我想講嘅嘢)

Tesla Autopilot功能 (HW2.5)

而家(2019年4月)出嘅車都配備咗叫做HW2.5嘅硬件配置，包括Model S/X/3。

HW2.5係喺一個Nvidia Drive PX 2嘅電腦上面行，車身前6後6個超音波感應器，前面3個唔同角度嘅cam，1個向前嘅雷達(即Radar，非光達LiDAR)，左右各有1向前1向後嘅cam，再有一個後cam。[都係抄Wikipedia]

標準選項係未必有Autopilot功能，可能要另外加錢先可以用。當然視乎佢係唔係做緊promotion。

目前Autopilot提供嘅功能有…

Adaptive Cruise Control/自適應巡航

加速嗰一部份同傳統幾十年嘅汽車cruise control一樣，set幾快就keep住行幾快。Adaptive部份係指會因應前車/物/人而減速停車，又或者如果前車比設定速度慢嘅就會跟住行。跟車距離有8個級別可以調校。如果有車cut入來(cut-in)會減速直至保持車距，而理論上見到人/電單車係會停 (當然突然衝出來嘅話係冇辦法違反物理定律而煞得停)。

唔會睇紅綠燈、讓牌、停牌。當然路口如果跟前面架車停當然會停。亦未醒目到見到前面隔離線拮起條尾就知到會cut入來嘅觸覺，又或預知見到有人過馬路，要cut到入肉先會判定前面有障礙。

踩油(踩電門？)會加速，但鬆腳後回落去設定嘅速度。踩Brake或通過軚盤上某支控制棒可以解除adaptive cruise control。

Autosteer/Lane Keeping/自動扭軚/行車線保持

Autosteer必須連同adaptive cruise control同時啟動，Tesla會喺確認見到行車線時喺錶板提示可以啟用。啟用autosteer之後cruise control最高車速會限制成道路限速(數據來自地圖)+10km/h。(mph地區唔知)

官方話只可以喺冇行人且有中央分隔欄嘅地方用，但技術上城市街道都認到線都會用得到，唔同嘅國家地區或者人為添設嘅限制。

過路口地下冇線嘅時候，如果前面有車(且阻擋住再前面路面白線嘅視野)就會跟車，見到線就會跟返線。如果前面冇車，就會assume個路口係直，直行直至見返線。