Member-only story
Tesla FSD v12 9up
幾日前Elon Musk揸住架有FSD v12嘅Tesla做livestream,demo咗一套全新唔hardcode但令到架車識自己揸嘅architecture,令我諗返起同我細個發嘅夢真係有啲異曲同工之妙。
有返咁上下年紀細個去過科學館嘅,或者會記得有上圖呢一個展品 — 駕駛模擬器。雖然係跑車形狀但其實係一部學車考車模擬器,起點係由科學館出發,然後好似經漆咸道落梳士巴利道最後到天星碼頭做終點,我唔記得終點喺邊因為似乎從來冇人能夠順利到達過 😂
話雖係一個模擬器,但其實只係播預錄嘅video (90年代播條AVI好高級㗎喇),並唔如現代玩Euro Truck Simulator噉真係有3D畫面。部機會喺適當嘅時候加旁白,例如轉落漆咸道前個燈位會教「其實睇唔到紅綠燈唔緊要㗎,跟住前面部車郁就得㗎喇」,又或某一個位有人衝出來會叫「前面小心」,又或要停車冇踩實時會叫「踩迫力~」、「轉完彎、要回軚先得㗎~」。而佢嘅判定點極其難觸摸,因為條video係冇完全冇feedback,通常玩唔夠一陣就會fail,然而又完全唔知道係炒乜 (極度懷疑真係啲腳掣或軚盤壞咗都未定,因為個個細路都大大地揼落去)。
細個發嘅夢
細過搭巴士,尤其係新界出入九龍嘅車程好鬼長,就會諗巴士可唔可以裝幾部模擬器俾人入錢去玩消磨時間?就好似細個喺雜貨舖前嘅搖搖木馬噉,又好似科學館噉喺車頭裝個cam就可以relay返個video signal,然後就如同科學館個展品噉樣玩。
進一步就諗,有啲司機手車好chok揸得好粗魯,玩模擬器嘅人入面肯肯定係會有人揸得好過師傅吧(例如我自己😂),可唔可以喺眾多模擬器玩家入面,由電腦不斷rank返邊一個揸得最好,如同科學館展品識計分一樣,然後用佢嘅輸出來直接控制架巴士?(又或者加權平均之類)。甚至乎當師傅有咩突發意外,都會有backup而唔會炒車 (如果噉啱有人玩緊嘅話😂)。
Tesla FSD v12
Elon Musk原片: https://twitter.com/elonmusk/status/1695247110030119054
精華 by AI DRIVR: https://www.youtube.com/watch?v=ZI7-Swmuo4A
Elon Musk同Ashok Elluswamy幾日前喺X (前Twitter) 做livestream,解釋Full Self Driving (FSD)新版v12會係一個end to end model,並冇任何hardcode寫低stop sign要停幾耐、迴旋處要讓車讓幾耐、跟車停要停幾貼、平時喺條路要揸幾快等等,而係將所有Tesla車嘅片都feed入去做training,得出一個大model。如同喺我嘅幻想入面,電腦會識得分開邊啲人揸得好揸得舒服,然後拎哂去學,然後電腦就跟住呢個model去開。