CVE 10分嘅後門: 台灣憲法有bug好難patch
政府嘅總預算案，連續五次都被立法院擋喺會議排期前
台灣行政院提呈嘅預算案，最近第五次被國民黨/民眾黨聯合擋住排唔上立法院議程¹。
原因係，行政院拎出來嘅預算案之中，對「原住民禁伐補償」嘅預算編列只係去到每公頃4萬元，但法例係每公頃6萬元。
而禁伐補償本來自2016年係每公頃賠3萬元，到今年6月4日喺藍白+2名綠營立委贊成通過下，修改成提升至賠6萬元。（另，原住民絕大部分都係國民黨票倉）
行政院院長卓榮泰稱，立院不能違憲要求政院編列任何預算，若不得已將思考是否依法聲請釋憲。
憲法點寫？
台灣憲法第七十條規定「立法院對行政院所提預算案，不得為增加支出之提議。」
的確立法院而家又唔係對預算案提出修正或修訂，無論係喺排期、定之後全體審查二讀表決，要表決反對都無問題。白紙黑字寫到明，我睇唔到司法對今次五擋預算案會有乜解釋空間。
香港基本法就寫得保險好多，第七十四條 「…凡不涉及公共開支或政治體制或政府運作者，可由立法會議員個別或聯名提出。 凡涉及政府政策者，在提出前必須得到行政長官的書面同意」
以香港嘅寫法，根本就唔會提出到呢種3萬變6萬嘅修正案，如果提到必是政府合意。
預算案唔過會點？
預算法第54條的規定，唔過就會照返之前嘅預算去run，所以係唔會出現美國式嘅政府停擺。
而如果立法院過半反對，憲法第五十七條規定行政院可以提請總統要立法院覆議，到時就維持原反對決定就需要2/3委員同意（藍白目前唔夠票）。但係憲法係針對「…對於立法院決議之法律案、預算案、條約案…」，被擋喺排期前因為未決議似乎唔cover，又或者因為噉所以唔想付之表決而採用拖字訣。
解散國會得唔得？
只有立法院通過咗不信任行政院院長後，總統先至有權選擇解散立法院，但唔可以直接解散。
就我所知，立法院單純擺爛係解散唔到。
另一方面，地方嘅議員包括藍白黨嘅，都因為地方政府攞唔到新budget，有啲想推嘅地方建設、改革都因為擋咗預算案倡議唔到，夾喺中間有啲尷尬。
亦有指民進黨醞釀緊搞一波大擺免，希望重奪國會。
預算案過又會點？
假設過咗一份只有賠唔足6萬嘅預算案，亦無按法律所定賠足6萬去執行嘅話…IANAL但受影響民眾應該可以通過發起「行政訴訟」向法院請求救濟 — 要求賠償或勒令改正，如同香港做司法覆核一樣。個金額係白紙黑紙寫喺法例，我諗司法都冇乜操作空間，亦應該唔會想介入而產生真•憲制危機…
所以我會話呢個憲法第七十條好bug，如同一個backdoor，只要立法院一直利用呢個backdoor，通過一啲要政府支出嘅法案，預算案理得你點寫，都可以玩死執政黨/行政院。
附註
- 台灣立院議程排程係由立委負責/投票，雖然本意係只做合規性審查，但今屆藍白合就經常用呢招直接擋法案，連一讀都去唔到。香港立法會係由秘書處（suppose係政治中立嘅公務員）去排議程。
