Member-only story
暗水印追蹤技術+Demo
Cap圖都可能被追蹤
Oct 2, 2022
水印同暗水印係乜？
水印，如同喺紙鈔上面所用嘅一樣，可以添加喺圖片、影片、甚至乎聲音同文字，主要作為一種防偽防盜嘅手段。例如一幅圖俾人偷咗再廣傳，個水印就可以証明版權誰屬。又或因為見到有個水印喺度，而使偷圖者卻步。
但要抺除或者破壞一個圖片上面嘅水印「其實唔難.jpg」，所以就有「暗水印」(aka 盲水印)嘅出現，等偷圖者唔知道原來偷偷加咗料、甚至乎利用密碼學算法，即使偷圖者知道有加料亦都冇辦法抹除個水印。
用途
正如好多工具一樣，暗水印除咗可以反盜版、仲可以用來做洩密追蹤－例如公司喺機密圖檔、或者喺系統中顯示敏感訊息時加上識別到使用者嘅暗水印。
但同樣嘅技術，亦可以被有心網站或有心當局利用，喺網站或SNS上面都加上暗水印，當一啲危害當局安全嘅敏感嘅內容被傳出去之後，用來追蹤傳出去嘅人。
再講白啲，如果暗水印入面有哂username、IP，而IP上網方式又同實名制有綁定嘅話…一個cap圖都可能會將自己身份供埋出來。
Demo
自製暗水印(盲水印)文字或圖片Demo: https://docs.it9.gl/watermark，所用原理分別如下。
隱藏字符
喺Unicode入面，有好多字係特殊格式字符。呢啲字喺顯示上唔會佔用任何空間，所以肉眼完全睇唔出，但copy and paste就會包埋。
Demo入面用咗8個隱形嘅格式字符，將暗碼編碼後收埋喺第一同第二個英文字之間。
隱藏背景
電腦中顏色一般係以0–255層強度嘅紅/藍/綠色所記錄，一共可以混合出16777216種顏色 (就非HDR而言)。而肉眼其實好難分得出極微細嘅色彩差異。
Demo中，暗碼係以rgb(255, 255, 254)即係非常淡嘅黃色形成背景圖。雖然肉眼睇唔到，但對電腦來講0就係0、1就係1，所以可以提取返出來。
