Member-only story

三峽大壩邊有咁易冧

唔通日本人講嘅都有錯？

4 min readJul 9, 2019

話說網上瘋傳一段自稱「地質專家Hayashi」嘅日文短片話，三峽大壩已經嚴重移位起碼達41米，就來要林鄭月娥…er…冧。而呢條片仲要喺反送中、武漢焚化爐、中美貿易戰再加即將來臨嘅傳統汛期之間出現，真係震驚14億人民，係唔係中央政府有咩隱瞞？

中國喺1975年就發生過河南75•8潰壩事件，幾萬～幾十萬人遇難 (準確數字不詳)。因為啲壩都係喺大躍進時代興建，施工同設計都有問題，當時再遇上N年一遇嘅颱風氣象就出事。

而時至今日，眾所周知若中國政府出來闢謠就即係真 (同燒山差唔多道理)。而的確喺7月5日，政府指Google Map有偏差；翌日，再指「符合重力壩變形規律，壩體變形處於彈性狀態」。今次有外國護照嘅仲唔即刻執包袱走人？

呢個係一個偽命題…有冇諗過可以係兩個都咁真，或者兩個都假呢 www。從最壞情況睇：中國政府講大話，而Google Map係真，喺呢個假設之下，三峽大壩係唔係就死硬？

中國政府講唔講大話who freaking care，先不作討論。

Google Map所謂嘅衛星圖，亦未必係人造衛星影，好多時可以係航拍而成。不過衛星定航拍去影都唔係重點，重點係影相呢樣將有深度嘅3D嘢，變成一張以2D圖呈現出來嘅話，係會有一個現象—視差(Parallax)。

如果有嘢一前一後，喺兩個角度望埋去，睇到嘅畫面會好唔一樣。我諗日常生活都有經驗，唔使再特別解釋吧？亦有好多平面遊戲利用製造視差效果，去營造前景以及多個背景喺唔同遠近嘅視覺效果。又例如足球小將，跑足成集前景個草地滾呀滾，但個背景都唔會點樣郁。