Member-only story
唔好阻住我返工搵食
今日因為反送中…明日因為IT？
8月5日大罷工
希望大家琴日有一個愉快嘅年初二假期 (誤)，首先以港鐵有限度服務揭開序幕，到下午時份政府配以強勁煙火效果連同市民搖曳嘅激光舞動一同助興，再加上撲到埋鼻嘅官能刺激，定必令好多香港人畢生難忘。
就直播所見，總有啲香港人真係好鍾意返工。我試分為幾個大類寫幾隻字。
「有錢乜都得，民主又唔可以當飯食」
我真心強烈建議有呢啲諗法嘅人去中國定居，呢個諗法同共產黨嘅施政方針基本上完全一致，上面搵錢機會亦多的是，發咗達再諗啦。
「我支持爭取民主，但唔好阻我搵食」
三個字：自私精。只係想人哋付出，但自己唔想蝕底以及坐享其成？
「我真係手停口停…，年過半百都好難轉工」
我覺得真係有困難嘅其實應該係由社會保障去照顧，香港嘅公共財政係應該負擔得起，起碼而家有公屋 (希望你已經排到)、有綜緩、仲有一堆衣食嘅資助同社區服務，搵個社工傾下，應該幫到手。
至於有話綜緩根本係養懶人，搵份part time但啲錢要全數上繳噉即係叫人唔好做好過啫 (有錯請指正)；又或，綜緩得嗰雞碎咁多真係連基本生存都好緊湊，要有尊嚴噉生活真係好奢侈，近年都係次次都靠派糖雙糧先好過啲。
以上提及嘅，我覺得係有改善空間，一個高度發展嘅國際大城市竟然冇更好嘅制度去令所有人有尊嚴噉生活實在可悲，不過政府又唔做嘢你又咬佢食？
以為係啲立法會議員唔做嘢？其實係冇得做…根據基本法第74條立法會議員係唔可以提出有關涉及公共開支嘅議案，退一萬步來講都仲有分組點票俾建制派佔大多數嘅功能組別反對。總而言之，有真普選雖然未必會即刻改，但都起碼有個機會改基本法再動議改善嘅議案，冇真普選嘅話就只能夠睇財爺心情等佢施捨。
所以懇請你支持而家嘅抗爭運動。
「我個中國團導遊㗎…搞到呢排暑假都變成旅遊淡季」
(首先我手上冇數字有幾淡，斷估都有大影響。不過實際數字唔會影響以下論點)
講真，真係需要短期解決燃眉之急嘅，請去連儂牆拎coupon，啲人放得出來就預咗俾人拎。雖然我認為呢種分配資源嘅方法唔太好，不過聽講社工都要好辛苦先派得哂啲餐券，要拎咪拎囉。
另，幾時都話唔可以靠單一客源㗎啦，多樣性係好重要，一個客唔可以佔公司太大比重係好重要。如果仲要係擺哂啲雞蛋喺中國政策呢個籃入面，當年佢突然可以開自由行，聽日佢一個華麗轉身就真係乜都冇。
