興趣使然的Youtuber

一周年多啲回顧

I.T. 9 遊戲日誌

3 min readDec 14, 2018

如果你唔知我有一個偏IT科普性嘅Youtube Channel…喺呢度：https://www.youtube.com/c/it9gamelog

同埋有個Facebook Page: https://www.facebook.com/it9gamelog/

Youtuber?

我唔知到幾多subscribers先算叫Youtuber，定得個公仔其實係咪應該叫VTuber，但有一樣嘢好肯定係，一定係一個興趣使然而去做……

因為Youtube至今仲未批我入Youtube Partner Program，即係冇廣告收錢。

乜嘢興趣使然？

我嘅興趣同好多男仔嘅興趣都一樣，係打機。頭幾條製作質素不堪入目嘅片係關於遊戲，從頻道名字(I.T. 9 遊戲日誌)都可以見得到。但好快就發現，打機叻唔過人，評Game更加差過鬼。得到零收視嘅結果係意料之內，但好明顯頻道必須要轉型。

工作上，我係一個師父(Mentor)、喺公司內部培訓我係一個培訓師、喺內部分享會我係一個演講者。我唔係一個鍾意對住一班人做演講嘅人，但當受眾反饋話學到嘢，我會勁開心。

部份影片靈感無疑係來自我喺其他場合演講過嘅題目。例如《史上最大空難 & 摩菲定律》，網上觀看人數係聽過我真人演講人數嘅千倍以上，而為數不少嘅「長知識了」留言，令我知道付出都係有人欣賞。

乜嘢興趣使然？

我嘅興趣同好多男仔嘅興趣一樣，科技嘅嘢、會郁嘅嘢 (機械人、飛機、車)……情況許可嘅話我一定買架飛機自己揸。

自細我好憎讀書 (如字面所指係讀一本本嘅書，Sorry金庸RIP我冇睇過，雖然上堂都係憎)，但自從呢個世界有咗Wikipedia之後，我發現求其click入去一篇，回過神來已經冇咗兩個鐘，因為裏面嘅hyperlink結集成一個好神奇嘅迷宮，會令人唔捨得走，以致我知道嘅嘢遠比Computer Engineering呢個範疇嘅多。

所以仲有好多話題想製成影片跟大家分享。